Барилгын дотоод засал чимэглэлийн талаар танд зөвлөхөд:

Барилгын засал чимэглэлийн ажил бол сүүлийн гүйцэтгэлийг хийдэг хамгийн нарийн ажил байдаг. Барилгын дотоод өнгө үзэмж нь мэргэжлийн дезайнеруудын сэтгэх чадвараас, харин барилгын заслын чанар нь нарийн мэргэжлийн засалчдын ур чадвар, мэдлэгээс шалтгаалдаг.  Зарим үйлчлүүлэгч ажлын гүйцэтгэлийн хугацааг богино өгдөг. Хэдийгээр хэн ч гэсэн богино хугацаанд өрөө тасалгаагаа гоё сайхан болгохыг хүсдэг ч, технологийн дагуу гэдэг зүйлийг мэддэггүй. Хуучин гадаргууг хусах, хуулах, хатаах, зүлгэх, бүр хонуулж хатаах зэрэг цаг их авдаг гэмээр зүйл гардаг. Хана таазны нэг багахан хэсэг шарласан байхад л яг технологийн дагуу хийнээ гэвэл дор хаяж 3-4 хоногийн ажил болдог. Гэтэл энэ маань харахад хана таазны нэг жижигхэн булан тохой байдаг. 

Замаска гэхэд л ямар гадаргуун дээр ямар технологийн дагуу замаскаа зуурах вэ, хэрхэн хатаах, хэдэн үе замаскыг гадаргууны хаана нь түрхэх вэ, ямар үед цавуугаа ихээр хийх, багаар хийх, элстэй холих уу, яах уу гэх мэт бас л олон асуудлууд гарч ирнэ. 

Обой л гэхэд олон төрөл байгааг хүн бүхэн мэддэг. Обойг хана, таазанд зүгээр л нэг наачихна гэвэл мэдээж мэргэжлийн хүний зөвлөгөө танд хэрэггүй байх л даа. Обой наах гадаргуу ямар байх, обой наагдаж байх үед ямар ажлыг хийж болохгүй байх, мөн обойг буруу наавал хана нь далий харагдана, обойны зах нь сөрвийж эхэлнэ, удалгүй хууларч унана гэх мэт олон янзын асуудлууд гарч ирдэг. Хээ таардаг обойны толгой хэсгийг аль хээгээр авах вэ, хаанаас нь эхэлж наах вэ, үлдэгдэл зүсүүрийг өрөөний хаана байрлуулах вэ, обой дутаж дахин олдох боломжгүй үед яах вэ гэх мэт олон асуудал мэдээж мэргэжлийн бус хүмүүст тохиолддог.

Заслын ажлын хамгийн чухал нь өнцөг булан нь тэгш гарсан байх, юу ч далий харагдахгүй байх, гүйцэтгэл нь бүрэн төгс гарсан байх явдал юм.